16強嘅賽事喺上個weekend開咗波嘞，我梗係冇錯過！首先出場嘅係東道主巴西對智利，巴西點睇都高一班啩。睇住班森巴兵一開波就攻到智利冇氣唞，18分鐘仲入咗波，除咗興奮外，心諗呢場出線應該易過借火啦！
點知唔使15分鐘就俾自己班後防玩死，送咗個機會俾智利追番粒。唉！下半埸智利仲唔摸清佢哋個底咩，尼馬係就係滿場飛，可惜好似唔夠力咁，一有對手埋身就輸晒；連侯克都話手球在先食咗個詐糊，巴西當堂冇晒氣勢。場波踢到120分鐘，睇到我以為連個天都唔鍾意巴西，點知又俾佢互射12碼贏咗，真係險過剃頭。
眼見巴西攻守都唔達標，中場又冇乜建樹，連一向最強嘅霸氣都仲未凝聚到，即時好懷念有朗拿甸奴、朗拿度（右）同李華度（左）嘅3R時代，嗰時佢哋真係場場霸王姿態，攻守更加唔使多講，鬥波好似喺到練波踢表演賽咁，就算我嗰時得幾歲，但都印象深刻，到𠵱家都仲會上網搵啲片嚟回味吓。
雖然背負全國兩億人嘅期望真係好大壓力，但希望巴西嚟緊可以踢番啲霸氣出嚟，葡萄牙出局之後，我撐硬你㗎嘞！
文：許家樂
識睇 一定睇蘋果嘅足動世盃：
http://worldcup2014.appledaily.com/