球場係英雄地，球員喺今屆世界盃嘅表現，亦直接影響佢哋返國時嘅待遇，好似喺分組賽得1分嘅南韓，返國後班國腳喺機場要硬食球迷嘅責罵同嘲諷；而喺16強出局嘅智利，返國後女總統連奧巴馬都唔見住，要接見佢哋先，待遇真係一個天、一個地。
韓迷接機怒掟麥芽糖
南韓日前回國，有唔少球迷接機，不過唔少係專誠去鬧佢哋嘅。有激進嘅球迷更加用麥芽糖掟班球員，可憐嘅一班南韓國腳，只能夠默默企喺到硬食。班球員本來都諗住快啲走，點知呢班憤怒嘅球迷，死都唔肯咁易放過佢哋，仲拉起寫住「南韓足球已死」嘅橫額，我求大俠就覺得，班球迷真係有啲過份，意大利球迷都未至於咁樣對同樣分組賽出局嘅球員啦。
智利英雄勁過奧巴馬
相反，喺16強互射12碼輸畀巴西出局嘅智利，回國嘅待遇就好唔同。一班球員返到去首都聖地牙哥之後，就被邀請去總統府，途中受到人民嘅熱烈歡迎，同返國之後俾人鬧爆嘅南韓球員，真係形成強烈對比。智利兵嘅地位，直頭連美國總統奧巴馬都比唔上，因為連智利女總統巴切萊特，都為咗接見佢哋而推遲咗去華盛頓同奧巴馬會面嘅行程幾個鐘，連奧巴馬都要讓路！總統巴切萊特仲話，球隊係全國嘅驕傲，對於佢哋喺巴西嘅表現出色高度讚揚。
另外，智利對巴西嘅16強中場休息嗰陣有段小插曲，智利前鋒賓利拿報稱喺半場時，俾巴西隊嘅通訊主管派華打。嘩，英雄都打，難怪國際足協紀律小組已經展開調查。
識睇 一定睇蘋果嘅足動世盃：
http://worldcup2014.appledaily.com/