和平佔中全民投票周日晚開票，佔中第二階段工作總算告一段落，三子個個都捱到金睛火眼，嗌咪嗌到聲沙沙。八方前晚問發起人之一嘅戴耀廷（Benny）心情如何，佢竟然話其實佢嗰刻最想趕返屋企睇荷蘭對墨西哥場波。不過，開埋票唔知趕唔趕得切睇喇。
不過，一眾球迷都知，前晚場波去到88分鐘，荷蘭追平1:1，到補時仲射入12碼，反勝墨西哥2:1晉身八強。Benny係荷蘭躉，噚日出席佔中記招回應公投時心情勁靚，一開場就話自己聲沙，唔係唔舒服，而係因為荷蘭場波，答答吓問題又兜番落場波度，話全民投票之後「個波就喺對方場區」，如何提出一個符合國際標準嘅政改方案係政府嘅責任。
至於另外兩子就好似冇乜興致睇波喎，陳健民笑言西班牙都出咗局，加上呢排忙到不可開交，所以冇睇，過埋7.1可能會睇番嘅；至於朱牧，佢就冇捧開邊隊，皆因免費電視冇播佢就冇得睇喇。
佔中毛巾今發售
講番全民投票，搞一次已「一鋪清袋」，用咗300萬左右，令佔中陷財赤，所以今日7.1籌款好關鍵，陳健民話希望籌到100萬作經費，佢哋會有毛巾、環保袋同佔中T恤發售籌款。都係嗰句：數量有限，有買趁手。
李八方
mailto:[email protected]