聲稱承擔咗亞視2億元可換股債券嘅股東查懋聲查懋德兩兄弟，因為追唔到債，今年4月入稟申請亞視清盤。事隔兩個幾月，亞視終於籌夠錢啦！啲錢邊度嚟？又係盛氏家族再放水拯救。亞視執行董事兼高級副總裁葉家寶（圖）噚日都有去高等法院，話氣勢如虹，會繼續做民主進程嘅見證者喎！
「做民主進程見證者」
葉家寶散庭後笑晒口咁講，多得盛氏家族，包括王征等人「義薄雲天」再出手相助，事件先解決得到。葉家寶仲一輪嘴講咗亞視嘅現況：「我哋近日氣勢如虹，工作量上升咗好多，7.1回歸我哋接咗七個大型活動，營運有好轉，我哋會繼續做民主進程嘅見證者！」響記者追問下，葉家寶就不認不認還需認，亞視依然仲蝕緊，但佢仲繼續撐：「我哋對未來充滿信心」。
亞視董事局前日喺5人支持4人棄權下，決議還住2億元畀查氏兄弟先，至於9,000萬元利息，亞視聲稱查氏只可以攞一半，需要傾吓點處理。代表查氏嘅資深大狀噚日同意將案件押後到下星期一，再向法庭匯報還錢情況。法官就警告亞視要認真處理，否則隨時下令要亞視清盤。
案件編號：HCCW103/14