機場第三條跑道是否應該興建，早已討論經年，6月20日機管局發表最新環境評估報告，立即引來不同環保團體激烈反對，指環評報告立論粗疏，數據不全，假設錯誤，犧牲中華白海豚等等，在環保團體眼中，第三條跑道環評係一無是處，難道成班環評專家／國際專家都係食塞米，南郭先生之流？前地政總署署長，已退休嘅劉勵超在佢嘅信報專欄（6月26日）講：「報告是本港及國際專家（包括學者）花了兩年的時間才完成，報告列出各種措施緩解不可避免的環境影響，然而有環保團體在報告發表當日即時質疑報告內容的全面性和可靠性，難道專家們都是膿包和大話精？」
其實環保團體（如地球之友、香港海豚保育學會之類）內裏有甚麼環保學者專家為佢地研究環評報告，或者只係靠佢地嘅職員做研究，有無可信性／權威性，還是疑問，如果大家要公開透明嘅話，環保團體內嘅專家與機管局聘請嘅專家最好來一兩次面對面辯論，等我地市民可以比較吓。聽講機管局專家之中，有兩名洋人研究白海豚嘅，曾經指導過香港海豚保育學會嘅洪家耀，可算得係洪家耀嘅師傅，師傅與徒弟公開辯論嘅話，市民自可知道如何選擇。
又有一個團體講SROI，指第三條跑道係大白象，其實何謂大白象？可能係指建造費用高，落成後就使用率低，收益少，浪費納稅人金錢嘅建築物。但香港機場明明使用率高、收益高、賺錢能力強，美國副總統拜登就話過處身香港機場之內，令佢感到紐約舊機場係過時第三世界產物。機場兩條跑道按現時貨運客運增長率，會好快就達到容量飽和，趕快興建第三條跑道，好提升容量，點睇都唔似係大白象喎；啲反對派（即反建設、反發展人士）話第三條跑道係大白象，幾難服眾，唔好以為拋出甚麼SROI就可以嚇到人。講到超支與延遲，新跑道須經典型「香港式程序公義」洗禮，先有三四輪諮詢，有三四輪反對，然後政府還是拍板支持，送上立法會要求撥款，到時必定有議員發動拉布戰，卒之通過撥款後，反對團體就會搞司法覆核、打官司起碼三年。到真係可以興建時，造價會飆升兩三倍咯！