德叔：潮人，乜得你大駕光臨呀，又係月尾手緊食茶仔呀，叫你唔好買咁多衫㗎啦，之前你唔係着意大利件9號巴神咩，今日做乜改着巴西10號呀。
潮人東尼：意大利出局，我就梗係收埋件衫啦，唔驚出街俾人笑咩，我之前仲買左葡萄牙、西班牙，着咗幾次就出局， 𠵱家都唔知仲着唔着好。
艇 仔 張：你咁識波，世界盃咪贏吓波，當幫補吓買衫錢囉。
福嬸：係呀係呀，早兩日尼馬咪轉身射個世界波，幫巴西打入8強囉，你買佢首名入球一定贏啦。
德叔：你個死婆又出嚟搞笑呀，係就係黃衫，係就係10號，不過嗰隊係哥倫比亞嚟㗎，8強佢哋就對巴西。
潮人東尼：你都咪話呢個占士洛迪古斯（圖）唔勁，我問咗幾間波衫鋪，哥倫比亞主場波衫斷晒貨咁滯，係仲有啲作客，我想買番件占士都要訂貨。
艇 仔 張：占士仔真係一戰成名嘞，賽後仲有傳皇馬想買佢㖭，哥倫比亞氣勢咁勁，對巴西已經落晒飛，個W由5倍得番4.85倍。
德叔：8強要星期五先打，東尼仔，咁你打算呢幾日都着住巴西波衫呀？
潮人東尼：梗係唔係啦，今晚我返到屋企就換件阿根廷10號，同班friends落吧睇波，希望美斯今次唔好令我失望啦。
艇 仔 張：你會唔會好似嗰個Lulu咁，着邊件波衫就死邊隊㗎，好，今晚就買你對家要瑞士。
識睇 一定睇蘋果嘅足動世盃：
http://worldcup2014.appledaily.com/