卓韻芝執導、張家輝同鄭秀文（Sammi）主演嘅《失戀急讓》會喺下月底上映，為咗增加搞笑效果，家輝更親自請老友張學友客串一角，戲中學友飾演一位律師樓師爺，有日家輝陪Sammi去律師行搞房契嘅事，當學友着晒老西同佢哋講解樓房合約細節時，Sammi對學友露出一個好冧嘅樣，搞到家輝呷晒醋，當佢發現學友係地中海，戴咗假髮，佢就死命想扯佢假髮落嚟，等佢當眾出醜。
假髮兩份戴
正式拍攝前，家輝係咁同學友示範點樣扯佢個假髮落嚟最有效果，平時唔多肯俾人搞佢個頭嘅學友，對住家輝呢位老友都冇符，竟然任佢舞個頭，現場嘅人都畀佢兩個笑死。後來家輝更索性將學友個假髮套咗喺頭度，估唔到佢戴得咁鬼自然，完全睇唔出係假髮，不過家輝就講笑話：「我戴得咁自然邊有喜劇效果，都係學友戴番啦！」拍完收工後，家輝仲打畀佢問：「兄弟今日拍呢啲搞笑場面慣唔慣呀？」學友答家輝：「我都走過喜劇路線，冇問題呀！」
撰文：馮仁昭
【7.1上街】 自己政府自己揀，直播7.1大遊行:
http://71.appledaily.com/