氣勢如虹嘅法國今晚同尼日利亞爭入8強，從法國大勝實力不俗嘅瑞士5:2後，大家都會認同法國有強勁嘅攻擊力，而且前線上仲有好幾個不同配合同選擇，唔知大家又鍾意邊位前鋒呢？
搞到基奧特冇碇企
賓施馬當然會係法國隊必然正選，只係睇吓前線嘅拍檔會係邊個？阿仙奴射手基奧特喺第1場分組賽冇正選，事後向記者表示不滿，第2場復任正選兼且有入球；但係第3場又坐番冷板。原因係年僅23歲、效力皇家蘇斯達的基沙文（圖）有良好嘅表現，比起將賓施馬移去左路，而畀基奧特打正中鋒嘅效果更佳，聽落好複雜？
唔緊要，只係想提醒吓你，今晚唔好錯過呢位11號嘅新星基沙文，金髮配上粗眉大眼，帥氣十足，通常活躍於前線嘅左右邊。
士哥=score
「士哥」解作入球，源自英文「score」。基沙文今屆世界盃表現搶鏡，可惜仍未能取得首個「士哥」，希望佢今晚加把勁啦！
文：陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/