德 叔：咦？祥Hi，一陣過馬會呀？成手都係飛嘅？
祥 Hi：係囉，我想搵番首名入球過關中咗嗰張飛……唔知擺咗喺邊。
德 叔：首名入球過關都中？
祥 Hi：
係啊，大前日之嘛，我其實買咗一場波各兩個人，總共4注，點知中咗45倍嘅維頓漢，加埋3倍幾嘅湯馬士梅拿，乘埋差唔多成140倍！我都冇諗過真係中，所以𠵱家好努力咁搵番張飛。
肥 頭：屎忽撞棍啫，佢有咁醒咩？維頓漢都中。
祥 Hi：
喂！我一向都鍾意咁買㗎喎，後衞加個前鋒，一冷一熱咁博，都係買10蚊玩吓。你睇過維頓漢喺熱刺啲波㗎，角球成日走上嚟頂波，有時又無端端衝上來射波，有成45倍，冇理由唔博㗎。
肥 頭：𠵱家你講咩都得啦！
艇仔張：
咁祥Hi又講得啱嘅，以小博大係咁玩㗎啦，輸又唔係輸得多，一次機會可能贏番晒之前輸嗰啲。
德 叔：
其實，今屆都唔少後衞入到波，我之前都計過，分組賽已經有4個係首名入球，計埋尋晚大衛雷斯入埋，都有5個啦！
艇仔張：
我之前有個老死就買中咗高甸，但佢𠵱家熱咗好多，之前喺馬體會入過唔少，所以冇維頓漢咁好分，得廿幾倍。
肥 頭：
講咩都假，今晚兩場波有冇咩貼士先？
艇仔張：
哈，你問我啊？法國嗰場啦！尼日利亞個龍安耶馬雖然救波勁，但出迎麻麻，我會博華拉尼同馬馬度沙高兩位中堅。
祥 Hi：咁我再試多次過關先，之後再買德國嗰場，再博梅拿。
識睇 一定睇蘋果嘅足動世盃：
http://worldcup2014.appledaily.com/