蘇亞雷斯（圖）咬人事件話咁快就有咗裁決，就係停賽9場同停止接觸一切有關足球嘅活動4個月，咁唔知打足球game得唔得呢？
有好多人都話罰得唔夠，仲話應該終身停賽，我就覺得刑罰已經係足夠，雖然佢已經唔係第一次咬人，但我覺得可以畀多次機會佢，因為撇開佢嘅缺點，佢其實係一個好出色嘅球員，如果唔係佢，烏拉圭唔會贏到英格蘭；如果唔係佢，利物浦今季嘅成績又唔知有冇咁好，況且佢幫烏拉圭殺入決賽周，相信背後所付出嘅努力一定唔會少，所以畀多次機會佢都係一件好事，呢4個月時間就等佢諗吓要點樣改，反省吓問題嘅嚴重性。
喺呢件事上面，我體會到機會真係要珍惜，就算你幾咁天才都好，你唔把握機會，根本唔會有畀你表演嘅權利，所以踢到識飛都冇用。而我亦會踢好啲波，再認真啲去練習，最重要就係要好好控制自己情緒，喺球場遇到咩事都要平心靜氣，尊重對手，因為唔係個個都好似蘇亞雷斯咁有多次機會，如果「千年道行一朝喪」，咁就唔抵啦！文：陳子樑
識睇 一定睇蘋果嘅足動世盃：
http://worldcup2014.appledaily.com/