在Lars Peter Hansen教授晚宴上，與恒基兆業副主席林高演同坐一席，於是同佢握手，又因有十年不見，送他一張新地址名片。林兄話：「我幾十年不變，都係嗰張！」左丁山笑曰：「你係恒基嘅一個constant！」
林兄幾十年在恒基服務，歷久不變，好難得，呢晚韓森教授吃飯前講The Consequences of Uncertainty，對計量經濟學／統計學權威嚟講，變幻才是永恒，不穩定性就是充滿變數（variables），少見恒常數（constant），預測結果（outcome）十分困難，任何一個計量模式都有三大因素：（一）Model Risk：不少事情發生嘅或然率，（二）Model Ambiguity：對模式可靠性之信心，（三）Model Misspecification：怎樣運用不完美的模式。教授嘅結論就係世界上難預測之複雜事情太多，或然率高低不同，對非常複雜嘅問題，每每可以無招勝有招，最好找尋簡單解決方案（complicated problems, simple solutions）。
權威教授如是云，凡人就為一啲複雜問題喋喋不休。6月24日信報有一篇長文，作者周月翔，題目係「三跑物有所值？大白象之首？」主要係講分析機場第三條跑道要運用「社會代價及回報評估」（SROI），英文應該係social return on investment。呢樣嘢並非新生事物，中文大學晨興書院院長莫理斯爵士（Sir James Mirrlees）（1996年諾貝爾經濟學獎得主）在1969年，就與Ian Little合著一本OECD出版經嘅Social Cost Benefit Analysis，提及不少社會非經濟因素（例如遷移農民居所，界外因素──即今天所謂之噪音、污染），及如何使用「影子價格」（Shadow Pricing）來計算基建之社會成本。現在機場第三條跑道引起「建設派與環保派」或「發展派與保育派」嘅大爭論，左丁山奇怪點解冇人邀請莫理斯爵士領導一個第三條跑道之SROI研究。香港環境特殊，航道覆蓋嘅住宅雖有噪音滋擾，但呢類滋擾未必會令樓價下跌，令居民蒙受實際經濟損失。昔日九龍城嘅樓價何曾特別便宜？今之將軍澳區有堆填區，又唔見得將軍澳樓價有大折讓噃，分析噪音、污染嘅影子價格，其實比較主觀，充滿uncertainty，分析方法一定有Model Risk，係時候請權威出山咯。