【苦中作樂】
【本報訊】晚上的上環永樂街燈光淡黃，行人疏落。自從世界盃開鑼，每晚零時之後，一排數十輛熄了匙的的士停泊路邊，的士司機大佬聚集樓上聯誼會醫肚及打牙骹。有司機大佬表示，世界盃期間生意大跌三成，一班司機索性停駛兩個鐘睇波，笑言「四年一度盛事，只能夠無奈接受啦！」
記者：韓耀庭
記者上周四晚深夜抵達永樂街近德輔道西一段，發現由街頭至街尾清一色泊滿紅的，至少超過40輛，蔚為奇觀。街燈微黃、夜闌人靜的街道，一個聯誼會的霓虹燈招牌及光管招牌相當搶眼。
男人的浪漫滿瀉
聯誼會內燈火通明、人聲喧鬧，數部電視正現場直播分組賽最後一輪賽事「德國對美國」。數十個的士司機大佬豪邁地一邊進餐、一邊睇波。每當球賽出現埋門及「士哥」鏡頭，一班男人同時起哄，夾雜粗口的噓聲或歡呼聲橫飛，那一刻那個空間，男人的浪漫滿瀉。
當了夜更的士司機27年的肥華表示，世界盃舉行期間，他個人的生意大減三成，「一晚大約搵少二、三百蚊」。他解釋，今屆賽事多數安排在香港時間晚上12時及深夜4時舉行，肯定對夜更司機造成影響，「夜晚12點開波後，條街幾乎冇人。無綫播比賽就少人出街，就算無綫冇得播，市民出街睇波，嗰兩個鐘頭都係冇生意。場波完咗，最多都係做多一轉（客）。」
於是，肥華與一班行家就索性到聯誼會吃晚飯兼睇波，他笑說︰「始終係四年一度盛事，惟有無奈接受啦！」他指現時仍未每場比賽都收看，但一到八強階段，就會場場坐定定欣賞，「我希望決賽係巴西對法國，然後巴西捧盃。講腳法、講組織，巴西贏梗！」
同場另一位司機大佬趙先生則稱，世界盃期間他的生意並沒有太大分別，「平時嗰段時間啲人唔會出街，有波睇反而出吓去睇波，生意其實同平時差唔多」。他表示，當每晚首場直播賽事完結之後，就會到附近睇波熱點兜客。
的士司機權益會創會會長李匡晉總括說，世界盃期間，夜更司機生意始終受影響，「開波前都仲有生意，開波後就水盡鵝飛」。於是，每逢賽事進行期間，各區的茶記、聯誼會及娛樂城等食肆，都會坐滿司機大佬，附近街道則泊滿的士。
識睇 一定睇蘋果嘅足動世盃：
http://worldcup2014.appledaily.com/