今屆世盃得番兩隊非洲球隊，尼日利亞同阿爾及利亞，佢哋今晚會分別出戰16強，對法國同德國，睇怕晉級機會都幾渺茫。所以，如果想欣賞尼日利亞「神龍」安耶馬嘅表現，今晚好可能係今屆世盃最後一次㗎喇，球迷們唔好錯過。
chok住挨門柱響朵
或者有球迷都唔知安耶馬究竟做過啲咩，令佢咁值得大家留意。呢位效力里爾嘅31歲守門員，算係今屆最出色嘅非洲門將，起碼唔似得加納門將達奧達咁樣派膠先。除此之外，佢亦做過唔少出位嘢，當中包括喺比賽期間，挨喺佢最好嘅朋友──門柱度，仲要對手帶波入到禁區，都依然要擺好個pose，面不改容，未去到最後一刻都唔做撲救嘅預備，難怪有網民封佢做「hea」王。佢喺對阿根廷嗰場就更加喺比賽途中，同阿根廷隊長美斯又握手又摸面，全程仲要兩個都笑笑口，唔知真係以為佢哋係隊友，定係踢緊慈善賽，完全唔似係踢緊世盃大戰。所以，今晚大家唔好錯過法國對尼日利亞嘅賽事呀，分分鐘又有搞笑嘢出現；加上佢亦係12碼劊子手，若果超霸鷹獲得12碼，隨時會由佢操刀㗎。
神經刀希基達最經典
其實，之前亦都出過唔少出位嘅門將。其中哥倫比亞嘅「狂人」希基達直頭係代表人物。希基達只得1米73高，佢一招「蠍子式救波」，當時令全世界都見識到守門員嘅真諦。除此之外，佢仲會出嚟扭吓波同射罰球，製造咗唔少入球機會㗎（不過係畀對手）。除咗佢之外，德國嘅列文都試過喺比賽途中，走去廣告板後面屙尿，都係屬於神經刀「神」龍一族。
識睇 一定睇蘋果嘅足動世盃：
http://worldcup2014.appledaily.com/