投票完結，通常都有謝票活動，例如狼英勝出特首選舉，即時去中聯辦謝票，多謝西環發功。今次逾70萬人投票撐真普選，港人要去邊度謝票？政界人士同小市民都認為，今次要多謝白皮書喺最後關頭「催票」。
噚日係全民投票最後一日，投票人數最終破紀錄。反應咁好，要多謝邊個先？民主之父李柱銘話，最多謝當然係香港市民，但某程度上要多謝白皮書，將《基本法》改頭換面，亦要「多謝晒」《人民日報》、《環球時報》嘅惹火社論、署名文章寫手，令港人覺得唔投票對唔住自己。
吳亮星「功不可沒」
學民仔黃之鋒都話要向白皮書「謝票」，佢有朋友平時連六四集會都唔去，但都因為白皮書而send咗過百個短訊叫人投票。之鋒話：「係咪要上去多謝國務院，可能都係，唔係佢冇咁多人投票。」之鋒仲話要多謝班黑客，否則「打不死」嘅港人唔會咁憤怒。公民黨陳淑莊都話，最應該「多謝」中央，否則港人唔會覺醒。
進步教師聯盟施安娜就話，除咗白皮書，吳亮星上周五喺財委會粗暴將東北撥款表決，都係「功不可沒」。唔少人都畀呢粒一啲都唔閃亮嘅立法會親中暗星，激到好嬲，要透過投票宣洩不滿。小市民陳先生就話，最應該多謝治港無方、搞到香港面目全非嘅狼英，所以要谷住氣嚟投票。
李八方
mailto:[email protected]
【7.1上街】 自己政府自己揀，直播7.1大遊行:
http://71.appledaily.com/