為人父母真係唔易，陀B嗰陣要搵定床位，BB都未識轉身、已經要幫佢搵定學位。要贏在起跑線上嘛！好似朱茵咁，之前有指佢唔想做怪獸家長，想俾鶯鶯一個快樂童年，所以佢同阿Paul黃貫中一樣，唔使個女好似其他小朋友咁要返playgroup增值，只係好似外國嘅小朋友咁，親親大自然，睇下故事書，聽聽兒歌，無憂無慮，就連今年可入讀嘅幼兒班都放棄報考。但有報道話，朱茵眼見競爭日大，而且好姊妹兼教友蔡少芬亦成日提佢，唔好拖喇，快啲幫個女搵學校啦，所以朱茵亦惟有急急趕尾班車，呢期亦密密幫個女惡補英文，希望屆時在名牌幼兒園St.Catherine's國際英文幼稚園後補面試度順順利利，可以同Ada個女「湯丸」做到同學呀。
湊小朋友嘅媽媽辛苦，懷孕中嘅媽媽一樣辛苦，好多嘢唔可以食，亦好多嘢唔可以做。不過已經第三度懷孕嘅張新悅就百無禁忌，早排同老公楊哲安去咗吉隆坡旅行慶祝生日﹐破戒大啖大啖咁食榴槤。前日，佢又再次犯孕婦禁忌，喺屋企爬高爬低將幅牆髹油轉顏色，起初張新悅貼咗張油漆嘅相，話：「週末天氣好，確定把家裏沉悶的牆換換顏色。開心找到環保的油漆。」過咗一陣，張新悅就貼咗啲搬畫嘅相，見佢一個人大住個肚，搬一幅半個人咁大嘅畫，一個大肚婆咁搬始終都唔係咁好，但係仲未完，過咗一陣，張新悅就貼咗佢親力親為髹油嘅相，佢仲要爬喺條梯上面，網民見到咁就立即好擔心佢，都叫佢唔好咁，話晒都大住個肚。
【7.1上街】自己政府自己揀，直播7.1大遊行：
http://71.appledaily.com/