就算唔計上個星期的急挫，港股過去幾年都只係浮浮沉沉，對比之下，印度股市和台灣股市連創紀錄或近年新高，真係羨煞香港股民。長期人升我跌，已經唔只係sentiment唔同，印度同台灣的情況，好明顯，就係資訊科技業的發展成為咗火車頭，拉動它們的經濟和股市。
香港方面，資訊科技業乏善足陳，只偶爾有一兩單「刁」，平均談不上發展，支持經濟的一向就係金融、零售同貿易。其中，金融業俾金融海嘯打沉，之後就輪到內地改革，每次改革都必先犧牲，我們就似犧牲多於受惠，仲在復原中；零售業方面，自由行同本地居民生活矛盾不斷，現在大家都預期自由行會收緊，好多旺區開始出現吉舖，行業周期有見頂回落迹象。
買自貿區概念股冇蝕底
至於貿易，從來都算係平平穩穩，大概係跟環球經濟周期一齊上上落落，不過，自從內地成立自貿區，情況就可能有點變化。金管局前總裁任志剛在他新書的序言中提到，內地成立自貿區，又在海外地區建立更多人民幣境外結算中心，削弱了香港的競爭優勢，至於香港人應該點應對，我諗任總的書名已經講咗──《居安思危》。
做人居安思危，係唔會錯。不過，對於內地發展自貿區，我自己就傾向覺得對香港係有危有機，唔會咁早打定輸數；始終，從世界歷史睇，每一個城市的發展，都係各種因素交集的結果，法制、文化、教育、政治、基建、商業慣例、外圍經貿環境等都有關係，唔係用一條方程式就可以複製。
當然，複製唔到，唔代表挑戰唔到，尤其是香港其中一個成功因素係背靠祖國，而假如呢個因素到了別處，咁香港其他的優勢仲有冇用？就算內地法制同商業慣例之類仍有待完善，但單單靠龐大的市場同高速的增長，就已經創造咗唔少龐然巨企出來，而自貿區的設立，就算抄唔晒香港，點睇都係會比原本進步，有利釋放內地企業的潛力。
其實，未有自貿區前，內地亦有經濟特區，譬如深圳珠海和香港的關係，便是既競爭又合作，有些業務、職位轉移到特區，但又為香港騰出了一些新的發展空間及升級產業；今次內地發展自貿區，相信情況仍然是類近，當然流失的業務有多少，香港能否把握機會進一步向產業鏈的高增值部份走，仍不是定數，這亦是有危有機的原因。
講咗咁耐，可能你會講「我夠知喇，點做先得㗎？」居安思危又好，有危有機又好，當然第一步係武裝自己，一方面自我提升競爭力，而另一方面就希望政府增加資源，資助及推動新經濟發展，人家新加坡的科技matching fund，只要有一些認可的創投基金參與，政府就投入六至八倍資金，一些好點子唔怕無錢發揮，香港呢？對不起，1:1的配對也極難申請，一些startup小企光是應付申請這個funding已夠煩，不用做本業了。
另一步就係我這種阿Q所為，一方面自己努力，而另一方面就買重自貿區股，當做對沖，萬一天時、地利人和皆傾向自貿區，香港機會少了，至少自己銀包都豐厚一些，就像士佳捱眼瞓睇波，點都會買少少零比零，因為咁辛苦爬起身睇，點知全場無入球，我都賺番消夜錢一樣，至於自貿區股買乜，近日港口服務股紛紛逆市上升，廈門港務（3378）圖表省鏡，廈門市自貿區已上報商務部，自貿區將提升公司估值，作為香港人，這個零比零點都要伺機補番注。
張士佳
筆者並無持有以上股份