懂得語言偽術不只限於政治家，金融界都有能言善辯嘅高手。英國巴克萊銀行黑池交易訴訟，徹底顯示大行「偽行者」風範。巴克萊LX為爭做華爾街黑池交易一哥，涉嫌向機構投資者隱瞞高頻交易商於黑池交易量，由原先所佔75%報細數話只得35%。與此同時，就唔容許高頻交易商以掠奪方式參與。點知有位職員食咗誠實豆沙包，話唔應該將高頻交易資料報細數，結果即時被炒。落足嘴頭氹大戶後，巴克萊又向高頻交易商通水，披露投資者買賣等敏感資料，方便佢哋落盤更易有斬獲。
巴克萊甘願冒險都係錢作怪，去年銀行股票收益達23億英鎊（約1,356億港元），當中近兩成來自黑池交易。巴克萊今次做「偽行者」博大霧都去得幾盡。雖然黑池交易透明度低，買賣雙方以匿名方式配對大宗股票買賣，但黑池所有交易都有紀錄在案，數據顯示有一半係由高頻交易商進行。巴克萊市向投資者說的所謂「睇實」高頻交易商，換句話係「睇實你哋點樣幫我日日賺」。
市場嘅眼睛係雪亮，巴克萊同其他有份經營黑池業嘅10間大行包括瑞信同德銀，單計周四市值蒸發成千億港元，兼同巴克萊劃清界線，退出佢哋嘅黑池交易。大話被拆穿，但唔等於撒謊者會講真話。巴克萊黑池業務交易量下跌，佢哋繼續睜開眼話係電腦程式有問題。
C+B
本欄逢周一刊出