紐約市新市長白恩豪Bill de Blasio係著名左派自由派，自己在紐約大學畢業，哥倫比亞大學碩士，上台接管市政府後，認為市內8間公立中學純以考試成績收生，有違多元化（diversity）宗旨，正在推動政府修改一條1971年訂立嘅州立法例，得教師公會大力支持，如果修例成功，就可以強迫呢8間中學收生時除公開考試成績外，還要考慮學校成績、上課率、其他考試分數等等，務求在精英公立中學內增加不同種族及不同家庭收入嘅學生。講到底，即係好似好多美國州立大學咁，收生分種族配額，最直接嘅結果就係令考試成績驚人嘅亞洲裔學生入學人數減少。
搞精英主義還是平均多元化主義，係一個恒久不變嘅爭論，一時之間，好難將道理講得清楚。在紐約工作嘅小B當年在加拿大最後一屆高考（A Level）考到全加前五十名（Top 50），以此成績，可以攞獎學金進入任何一間加拿大大學，但佢想到美國讀書噃，於是申請美國名校，點知第一間拒絕佢入學嘅就係UCLA，令佢大吃一驚，幾乎想喊，但跟住收到芝加哥大學錄取信件，仲俾埋獎學金㖭，於是佢好高興咁去咗芝加哥。唔通UCLA醒過芝加哥？當然唔係，芝大排名比UCLA高好多，理由係芝加哥係私立大學，只收精英學生，不及其餘，UCLA係州立大學，有種族配額，唔想收太多亞洲裔學生而已，理得你亞裔是否考試尖子。
老友記袁天凡係芝大校董，佢與陳家強、王于漸、雷鼎鳴、李天命（新亞師兄，芝大博士）等等大概係香港最出名嘅芝大校友。6月23日，袁天凡邀請左丁山到恒生銀行博愛堂與芝大著名教授、2013年諾貝爾經濟學獎得主Lars Peter Hansen會面兼吃晚飯，左丁山上到去，原來有接近三百名芝大校友到場，熱鬧到極，袁天凡致辭時話芝大有一個習慣，就係校友聚會，必有人演講，討論嚴肅命題，今晚就係請Hansen教授講The Consequences of Uncertainty。教授雖然講得輕鬆，左丁山就聽得吃力，呢位著名學者發明計量經濟學應用嘅GMM（Generalized Method of Moments），左丁山鬼識咩！教授嘅太太原來係著名華裔經濟學家蔣碩傑之千金，蔣教授在80年代返回台灣出任中華經濟研究院院長，痛駡通脹係五鬼運財，啲文章寫得好通俗，左丁山就睇得明白嘞。呢晚見到好多芝大校友多數係中環財經界高層，校友陳家強局長當然走來捧場，芝大於九月就在香港開課，精英留意吓嘞！