分組賽完結，第一、二輪瘋狂爆冷、反敗為勝之後，第三輪賽果又全部正常番，入球率亦開始降低，進入十六強後，比賽一定更保守，寧和莫失，大手交易將成過去，主其他更加唔使諗（回帶：最激一場係荷蘭豆怒炒西牛5：1，最多入球一場係法蘭西多咬瑞士糖5：2，全部歐洲內戰）。
十六強有幾場和味濃，即係你八十分鐘開電視等睇加時十二碼好過，今晚四點場希臘對哥斯達黎加，兩邊防守力強，你五點半先起身，隨時六點半先分勝負再返工（我好憎希臘，但係佢哋永遠有超技術進級，好似建制派）。返工你都唔係做嘢㗎喇，公司大把人請假，因為七月一日又紅日。
進級十六強賽事，有兩場大家都覺得「有冇搞Ｘ錯」，烏龜食意粉其一，聖鬥士殺大象為其二。烏龜蘇七咬人，竟然逃過球證法眼，意粉經已食紅牌打少一人，如果蘇七能夠即時離場，相信亦都唔會咁容易入一粒，歷史隨時改寫（不過牙擦蘇已經返歸，文章見街時應該被哥倫比亞KO）。
另一場，希臘隻喪屍森馬拉斯，疑似禁區左腳勾右腳，九十三分鐘博到十二碼仲入埋殺大象，可謂「黃金仆街」。
以上兩件「喪屍」公然用超技術偷雞，同立會吳亮星監粗嚟扑槌一樣黑暗，今日六月廿九公投最後一日，之後七一遊行，球迷捱眼瞓，齊對抗黑暗。
文：梁柏堅
識睇 一定睇蘋果嘅足動世盃：
http://worldcup2014.appledaily.com/