荷蘭喺分組賽表現出色，而墨西哥亦先後成功賽和巴西及輕取克羅地亞，論表現兩支球隊都抵讚，不過我就嫌荷蘭踢法太個人，今晚都係會撐墨西哥，你又諗好支持邊隊未呢？
撐墨西哥嘅原因又點止一個？其實支持「小豆」先喺重點！查維亞靴南迪斯（小豆、圖） 喺2010年加盟曼聯後鋒芒盡露，憑出眾嘅入楔同埋靈巧嘅走位，令佢極速彈起。可惜其後受傷患影響被貶為後備，但都可以多次入替後奠勝，所以有後備殺手嘅稱號。
娃娃臉討人歡喜
同樣，墨西哥教頭重用杜斯山度士同埋奧利比柏拉達雙箭頭，小豆又再做後備，每場波都以後備姿態上陣，雖然暫時只係得1個「士哥」，但佢每分每秒無間斷嘅跑動為球隊同球迷眼睛注入活力。加上小豆個樣可愛，一副娃娃臉，令佢有唔少粉絲支持。
「篤波」要靠快
好多門前快射嘅球員都會「篤波」，唔係打桌球嗰隻，而係用腳趾尖發力，快篤破網。小豆出名喺禁區內把握力好，希望佢今晚以後備殺手落場「篤波」建功啦！
陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/