政府及建制派強行通過東北撥款，行政會議成員兼立法會民建聯議員李慧琼昨出席一項中學生活動時，被多位英中名校生發炮圍攻，指前晚表決過程是立法會最黑暗一日，形容建制派如同「㩒個掣」就將受影響居民送上「斷頭台」；並指財委會主席吳亮星以0票躋身立法會，顯示功能組別制度令人「好惡心」。
第七屆模擬立法會活動昨舉行開幕典禮，今年有115名中學生參加，絕大部份來自英中或直資名校，立法會主席曾鈺成和教育局局長吳克儉任開幕主禮嘉賓。其後進行的立法會議員辯論環節，台上、台下都向政府和建制派發炮，但曾、吳二人已離開。
辯論題目本是「立法會的過去、現在和未來」，卻變成怒轟前晚財委會表決情況。民主黨劉慧卿一句「你估（泛民）議員成日圍住吳亮星好得意」，台下全場拍手；屬建制派的自由黨鍾國斌也批評表決過程「都有少少夾硬嚟」。
主持問台下學生是否支持拉布，至少20人舉手支持，無人表示不支持；再問是否支持佔中，有約10人舉手，4人反對。
「功能組別好惡心」
曾鈺成在致辭時指要實現高質素民主，必需要有高質素議員。一名男生向台上李慧琼發問：「前晚係立法會最黑暗一天，請問係咪符合有質素議會？」她回應時反駁，「批評主席（吳亮星）處理冇質素，點解唔批評（泛民）議員濫用議事規則？無限拉布？」
荃灣公立何傳耀紀念中學一名男生也質問李慧琼，他指每項政策都有一批受害人，「係咪政府每次推邊班人上刑台，喺立法會入邊㩒個贊成掣，幫政府推佢哋去死，就係最高質素、最好行政立法配合出來情況？」李慧琼藉踩低反對新界東北發展的居民，力指保皇有理，「𠵱家好嘈嗰班居民，據我了解係啲寮屋居民，佢哋冇業權，當時係霸地起屋。政府已經將賠償提高至60萬，𠵱家嗰啲係資產過咗額，唔可以上公屋。」
吳亮星透過金融界功能組別自動當選，一名觀塘瑪利諾書院學生批評功能組別令人「好惡心」，「劉皇發、吳亮星都係0票，佢哋將個人利益凌駕公眾。」
學生憤怒
黎冠廷（港大同學會書院）：
「好嬲，表決過程好粗暴……其實好多謝建制派為7.1造勢，可能佢哋支持遊行先咁做！」
郭依晴（英華女學校）：
「今日嘅東北，可能係聽日嘅《基本法》23條，所以必須做司法覆核，改變現狀。」
文博彥（荃灣公立何傳耀紀念中學）：
「接受唔到（吳亮星）夾硬嚟，本來立法會已經親政府力量大啲，𠵱家仲要趁反對議案議員唔喺度（座位）就投票。」
【7.1上街】自己政府自己揀，7.1上街爭公民提名！
http://71.appledaily.com/