肥頭：德叔，埋單唔該。
德叔：你埋單還埋單，對手唔好大動作，唔好批中我堆橙呀。
艇仔張：生意唔好呀，德叔，諗住食夠30蚊就送橙呀？
德叔：你個死仔張，啋過你把口，我放堆橙喺門口，梗係捧荷蘭拎到冠軍。
肥頭：你有冇咁迷信呀，唔通我養德國狼狗，德國就會贏咩？你仲無知過福嬸。
福嬸：做乜無啦啦拉埋我嚟講，我雖然係迷信，都唔會覺得食橙，荷蘭就可以贏世界盃。
艇仔張：不過話時話，荷蘭捧盃嘅機會真係好高，16強對墨西哥，實力真係一般，再望遠啲，8強對手唔係哥斯達黎加就係希臘，荷蘭入唔到4強，就唔好返屋企。
肥頭：分組賽都幾多冷門喎！西班牙、英格蘭出埋局，16強唔通冇得爆？
艇仔張：嚴格嚟講都叫做有得爆吓，應該係哥斯達黎加，隊波越打越順，對住希臘應該有計。不過馬會都開平手盤，已經睇得佢哋幾高，都唔算係大冷。
福嬸：哥輸就嚟瓜？呢隊波個名咁衰㗎！點會贏呀？希臘就唔同，之前佢哋叫做咩「歐豬五國」，梗係好多豬出口啦，應該搵到食，我就買希臘嘞，有成2.75倍㗎。
肥頭：唔通真係有儍人有儍福，星期日就知？
人物介紹：
德叔—旺角茶仔老闆
肥頭—吹水怪
祥Hi—肥頭屋村老友
福嬸—茶餐廳侍應
街霸Ken—收費電視企街sales
艇仔張—扮專業賭友
識睇 一定睇蘋果嘅足動世盃：
http://worldcup2014.appledaily.com/