【本報訊】遠赴巴西直擊世界盃是不少球迷的夢想，先後五次到主辦國睇波的康寶駒，足迹遍五大洲，出名是「巴西狂迷」的他，坦言從未如此興奮過，「一有巴西嘅比賽，全國放假一天；一行出街，見到一片黃，就覺得好興奮！」首次踏足足球王國，他形容是「朝聖式公幹」，人生無憾！
一日睇三場波
「未去巴西之前，都好擔心治安唔好，唔係暴動，就係罷工。嚟到反而覺得好安全，酒店24小時有警察站崗，就算去沙灘，都見到好多警察喺度巡邏；反而上屆喺南非，感覺好差，旅遊車出入，前後各有一部警車夾住行，中央台又被搶劫，喺街上行都心驚驚。」但他指巴西交通不便，令同行朋友困擾萬分。
「我因為有公務，要全部時間留喺里約，影響唔大，但我啲朋友，想要飛去其他城市睇波，就轉機轉到儍。」每天開會，一日睇三場波，扣除食飯瞓覺，全天候都是足球，「只要同足球有關，開會都咁開心。」完成分組賽的聆訊工作，留在巴西近三星期的他便要返港，不能現場看餘下賽事。問他有沒有看過基督像？他搖搖頭。在這個超級球迷眼中，世界新七大奇蹟，吸引力肯定比不上足球。
識睇 一定睇蘋果嘅足動世盃：
http://worldcup2014.appledaily.com/