喺過去一星期嘅比賽，見到有好多欠缺體育精神嘅場面，除咗蘇亞雷斯咬人，亦有喺阿根廷對尼日利亞場波度出現。
唔知大家有冇留意到，踢到70分鐘，阿根廷前鋒拿維斯去場邊飲水，教練沙比拿順勢捉住佢傾吓戰術安排，但唔知佢係唔滿意定想放鬆吓，突然間用水噴教練（圖），雖然話沙比拿睇落唔係幾介意，但喺呢啲咁重要嘅比賽，鬆懈一秒鐘，除時都會出事㗎，就算我唔係阿根廷球迷，但見到咁嘅場面，心入面只有一句說話，「波並唔係咁踢」。
因為世界盃又叫大力神盃，係頒畀最優秀嘅球隊，優秀嘅意思唔只係球技贏晒，品格都要優勝，拿維斯咁樣點對得住大力神盃呀！而且細細個踢波，教練就教我要用心踢，練波、鬥波嬉皮笑臉就一定鬧，要我認真啲，初時都唔知點解，慢慢先知呢啲叫體育精神，要尊重比賽、尊重對手，更加要尊重教練，真係希望咁冇體育精神嘅場面唔好再俾我係電視見到啦！今晚開始就踢16強，相信會越嚟越刺激，一於做二仔底！即係點？死跟囉！
文：陳子樑
識睇 一定睇蘋果嘅足動世盃：
http://worldcup2014.appledaily.com/