小YY嘅中學同學效法孟母三遷，為咗寶貝女入讀一間「幼兒班」或者係英文嘅preschool，不惜離開居住多年嘅元朗中產獨立屋，搬到去南區藍籌屋苑，與丈夫要重新適應番新社區生活及交通安排。今時今日，父母愛子女無微不至，左丁山只能拍掌。小YY話：「要進入名幼稚園，事先就要入一流幼兒園，一流playgroup，然後先至有望進入名小學、名中學，到外國爭取入長春藤大學或牛劍。」
呢個講法，同一位去世嘅日本慶應大學老教授嘅說法相同。當年佢來中大做客座教授，開「明治維新經濟史」一科，左丁山唔知行乜運，考試攞到A+，於是佢提議左丁山到慶應大學讀碩士，左丁山儍儍地，話自己唔識日文，又窮到燶，唔敢去慶應呢啲日本貴族私立大學，點知教授話：「我收你就得啦，先去讀日文，然後攞文部省獎學金。」左丁山年少無知，唔夠膽去，後來卒之一位同班同學聽咗，勇闖慶應，讀咗個碩士返嚟，回想起嚟，如果當年聽話，一生歷程會改變晒。曾問過佢：「日本中學生點樣先至可以入慶應。」佢答：「入慶應附中。」如何入慶應附中？答：「入慶應附小。」如何入慶應附小？答：「入慶應幼稚園！」如何入慶應幼稚園？教授就好嚴肅咁答：「呢個係日本社會一個高層次問題，要用不少辦法。」
太陽之下無新事，最近睇CNN一篇報導，紐約接近1%嘅父母，為了兒女入紐約preschool，傷盡腦筋，花錢如流水，曼赫頓上東城區（Upper East），即豪宅區，有顧問公司向每家庭收取13,000美元顧問費，教父母如何為兒女申請入訓練班、幼兒園及幼稚園。嘩，一萬三千美元係美國家庭入息中位數嘅四分一以上，普通家庭當然負擔唔起，1%人士使咁多錢，咪就係讓兒女有個機會入哈佛囉，當然，其他99%嘅子女，如果讀書叻又唔駛咁嘅。彭博通訊社另有一篇報導，講紐約有8間公立中學，根據43年前嘅市政府政策，收生只睇培新（Pearson）公司設計之Specialized High School Admissions Test嘅測試成績，2014年有27,817人考試，8間精英公立中學收咗5,196人，其中一間歷史悠久嘅Stuyvesant就出過4位諾貝爾獎及政經界名人和明星James Cagney等等社會精英份子。呢間學校40年前嘅學生主要係猶太人，但今天呢，3,292名學生中，73%係亞裔，22%白人，2%拉丁裔，1%黑人，而全市人口之中，亞裔只佔15%。唔怪得新市長上台後，話要廢除考試為唯一收生標準了。