世界盃如火如荼，不過8月16日先開「咧」嘅英超已經起革命，新任曼聯領隊雲高爾，雖然仲喺巴西帶緊荷蘭備戰16強，不過遙控出手，一口氣連簽兩人，繼簽入畢爾包中場安達靴里拉後，英格蘭左閘勞基梳爾亦喺周五完成體測，兼正式加盟，簽咗4年合約。曼聯一口氣簽兩將，大嗱嗱要用6,020萬鎊（約7.9億港元）。
英格蘭世盃1分出局，鶴臣、謝拉特等都屬於罪人之一，好彩球迷怒火燒唔到18歲左閘勞基梳爾嗰度，返到英格蘭第二日就好快搞掂埋轉會，英格蘭恥辱出局都冇影響佢嘅身價；勞基梳爾周四已經到咗曼聯體測，喺周五宣佈落實交易，據報轉會費成3,150萬鎊。
安達靴里拉：夢想成真
另外西班牙小國腳安達靴里拉已經早勞基梳爾一日成魔，曼聯出到違約金2,870萬鎊，由畢爾包簽到呢個全能中場，24歲嘅佢對於加盟曼聯當然好開心：「加盟曼聯令我夢想成真，之前代表畢爾包踢歐霸盃作客奧脫福時，已令我印象難忘，我好開心成為曼聯一員。」英國傳媒估計，靴里拉獲10萬鎊周薪。曼聯上季排第7，連歐霸盃都冇份踢，新一季雲高爾仲話想搵埋自己啲子弟兵，好似荷蘭國腳洛賓等，紅魔鬼下季陣容真係夠晒嚇人。荷蘭打入16強，曼聯又簽得猛將，荷蘭教練雲高爾心情愉快，周四仲邀請巴西名宿薛高觀操，仲送埋印有薛高嘅荷蘭10號波衫。
摩帥認下季英超難踢
世盃期間出手嘅英超列強，又點止得曼聯；曼城周四就宣佈簽入波圖中場費蘭度法蘭斯高，轉會費都要1,200萬鎊，車路士就喺世盃開打前由巴塞隆拿簽入中場法比加斯，迪亞高哥斯達相信好快上「車」。列強紛紛出手擴軍，車仔領隊摩連奴都話：「下一季英超爭奪會好混亂，雖然我希望球隊可以拎冠軍，但以目前形勢，車仔跌到第6都有可能。」
識睇 一定睇蘋果嘅足動世盃：
http://worldcup2014.appledaily.com/