一條毛巾足以令你減少腰痠背痛？話咁快世界盃分組賽已經完結，16強又開打，對於大部份時間都係瞓喺床上或梳化睇波嘅你，腰背應該有啲異樣。今期物理治療師郭志堅教你用一條大毛巾，紓緩腰背問題。
記者：徐嘉華
攝影： 羅君豪
註冊物理治療師：郭志堅
示範：陳嘉穎（香港長跑青年軍代表）
場地：ASA物理治療診所（中環）
1.瞓喺床睇波睇得耐，條腰好易唔舒服，主要原因係腰部有個生理弧度，你可以捲起一條大毛巾，將佢放喺腰嘅弧度下（圖１），可以紓緩腰背。但唔建議成晚都咁瞓，因為你瞓着時難免會轉位，毛巾移位嘅話，有機會頂住身體其他部位，反而未能安睡。
2.睇波睇得緊張時，會不自覺瑴前去睇，上身好易產生痠痛。同樣捲起一條大毛巾，放喺胸口嘅後背位置，雙手向後伸直（圖２），盡量貼喺床上，可以避免拗住條頸，動作正確嘅話，你會感到頸部垂直、背脊喺毛巾承托下會鬆弛好多，做10幾秒至5分鐘都可以。
3.紓緩頸嘅痠痛，可以將捲起嘅大毛巾放喺頭後，雙手將毛巾向前拉（圖３），同一時間，頭向後壓，動作唔使太大，避免傷及頸部，數10秒後，可拉頭嘅左邊同右邊，有助血液循環。
郭志堅
註冊物理治療師
識睇 一定睇蘋果嘅足動世盃：
http://worldcup2014.appledaily.com/