城中最近有兩個C字女好惹人關注，除咗喺政總絕食中嘅偲嫣BB，當然唔少得喺facebook貼𠝹手「自殘」相嘅屍歪女梁齊昕。𠝹手相一出，惹嚟坊間唔少猜測，包括阿女都管唔好、狼英何德何能管香港？面對質疑，狼英連日消毒，繼日前透過梁粉傳媒同facebook專頁「港人講地」發佈同齊昕嘅合照後，噚日再喺網誌大晒全家福，以示佢哋全家都好幸福。
阿女搞出大頭佛後，狼英噚日先肯喺題為《到英國參加女兒畢業禮》嘅網誌，首度披露今次放假查實係去劍橋出席細女頌昕嘅畢業禮，仲大晒一家五口，包括埋大仔傳昕在內嘅合照。
相中可見擺咗自殘相上facebook嘅齊昕精神唔錯；大家梗係關注，佢嘅左手仲有冇嗰兩條血痕？可惜齊昕着咗西裝褸，無法引證，但佢卻刻意將隻左手擺側。到底真係有啲嘢，定係一如有啲人話齋，係attention seeking？
元秋好擔心世姪女
查實狼英成篇網誌，都冇講阿女係咪𠝹手自殘；身為齊昕auntie嘅民建聯元秋就話好擔心兼好唔開心，前日打過電話畀梁唐青儀問世姪女有冇事？元秋引述梁太話，「冇事啦，冇事，你睇《巴士的報》啦，報道咗，冇事」。齊昕其後喺自己fb貼咗同阿哥細妹嘅合照，同樣都遮住咗左手㗎。
李八方
mailto:[email protected]