【世紀絕食第5日】
前晚入醫院嘅偲嫣BB喺瑪麗醫院留院一晚，好快就出院再返政總繼續絕食。佢話入院都係吊咗鹽水同葡萄糖水，冇食過嘢㗎，而佢堅持出院嘅時候，醫生都扁嘴，希望佢留院繼續觀察喎。偲嫣BB話為咗反對暴力，佢會支持到最後，再入院都冇有怕。直至噚日晏晝4點，佢絕食咗100小時（圖），輕咗9.17磅喎；正義聯盟嘅盟友勸佢停止但唔成功。
袁彌明：化妝都冇得救
對於有網民不時帶食物去探佢，仲幫佢整埋車頭相，偲嫣BB話覺得好失望，慨嘆香港竟然有人用唔同方法詛咒佢，呼籲大家反對網絡欺凌，向一切暴力說不。但查實唔妥佢嘅又豈止網民？
八方噚日見到人民力量主席袁彌明，問佢會唔會探偲嫣BB？佢即時閘住再反彈咁話：「我唔想做啲咁邪嘅嘢。」問到會唔會同偲嫣BB交流減肥心得？佢就半帶諷刺話：「飲西瓜汁會加快脫水㗎。」
偲嫣BB絕食後塊面都V埋，仲不時放自拍照等人「我見猶憐」，未知身為港姐嘅袁彌明會唔會向瘦咗嘅偲嫣傳授化妝心得？「有啲人，其實冇得救」，唔知偲嫣聽到會否O嘴？