香港人真的很重視保育……如果要付出的只是俾錢消費，以及影相打咭。
譬如我們很喜歡1600隻熊貓襲港，多可愛，又有保育意義，我們都知道的，1600，代表野生熊貓的僅存數量，真的太可憐了，我們一定要好好保護大熊貓啊！來，快拍一張照片，多可愛，紙熊貓的表情太有趣了。
我為了保護野生熊貓付出甚麼代價？這個嘛，我願意認養一隻紙熊貓，那些善款好像會捐給大熊貓野生基地做保護用途。
我對保育的確有強烈的信念和堅持，甚麼？我願意為保護中華白海豚，付出多少呢？
無問題，係咪要買tee？係咪買一件tee就會捐幾毫子俾相關機構？我會買一打囉。係咪有慈善首映？我一定帶埋細路嚟睇。
甚麼？要停止興建機場第三條跑道，不准填海，讓路予中華白海豚？這個嘛……生態嘅嘢我唔係好熟，但聽講條跑道遲起一日，經濟損失成百幾億，我就覺得，無理由為咗幾條海豚而影響城市嘅經濟發展囉，係咪？
即係同樣道理，無理由因為發現乜鬼管海馬、螢火蟲，而唔俾人發展新界㗎。人都無得食，點得閒理啲昆蟲生物啊！
黃鴨襲港，當然有朝聖影相啦。黃鴨代表簡單快樂代表愛囉，我好buy呢個價值，簡單就是美嘛，回歸基本最開心。
咩話，新界東北發展點睇？老老實實，村民應該見好就收啦，唔通真係不遷不拆咩，香港唔駛住人唔駛發展咩？香港仲邊有人耕田㗎？咩話？你寧願種瓜種菜自給自足，都唔要發展新城鎮？唔好玩啦，經濟點可以唔發展，點可以不遷不拆㗎？
香港人真係好支持保育㗎，如果要付出的只是俾錢消費，以及影相打咭。