早兩日響D組最後一輪賽事，蘇亞雷斯激到咬咗基亞連尼膊頭一啖，有片有相成個牙齒印都唔駛直紅，仲要佢有前科喎。雖然「殭屍蘇」逃過球證嘅法眼，但就俾球迷同好多球星鬧到反艇，見到佢啲咁癲嘅行為，令我諗起正義男神C朗。
大家都係球星，點解C朗可以咁靚仔又善良呢？大家有無留意到佢最近嘅新髮型先，佢喺頭嘅右邊剃光咗兩行，網上傳佢專登幫啱啱做完開腦手術嘅西班牙10個月大嘅病童Cruz打氣，仲出埋錢幫佢找數，雖然BB嘅媽咪就澄清C朗嘅新髮型並唔係為咗佢囝囝而剪嘅，但就證實咗C朗真係應承負責佢嘅手術費。
平時個樣寸寸貢嘅C朗其實超有愛心，仲定時去捐血幫人，一個好球員除咗踢波勁外，喺球場外嘅品行都好重要，呢啲亦係C朗嘅魅力。講到魅力，我啲女同學近期都俾世界盃吸引住，佢哋仲癲過我，考緊試都睇到兩點幾，但夜瞓係皮膚嘅天敵，佢哋就話最多一路敷mask（圖）一路睇補番數喎！文：許家樂
識睇 一定睇蘋果嘅足動世盃：
http://worldcup2014.appledaily.com/