三哥同米雪一句「藥箱變成手飾箱」令御藥堂（8185）變得街知巷聞，可能公司見明星效應使得，御藥堂噚日又簽多個代言人，就係一向鍾意飲咖啡嘅陳豪，陳豪將會為公司同中大合作出嘅「中大中藥傳承」品牌系列保健產品做代言人，噚日專登去到中大搞簽約，又話自己自細都有食開中藥，真係抵佢咁受歡迎。
今次應該係繼之前香港電訊（6823）後，陳豪再替上市公司做代言人，御藥堂主席陳恩德唔講代言人費用，只係話希望「中大中藥傳承」系列會好快有盈利貢獻，又話今次唔會好似之前送股畀三哥咁送畀陳豪。
唔送股票，斷估御藥堂都會免費供應呢個系列嘅保健產品畀陳豪，但睇番系列嘅四個產品，一種可改善血液循環同皮膚質素、一種適合更年期女士、另外兩種主要係預防骨質流失、強健骨骼同關節，唔知邊樣啱陳豪呢？