香港航空投資成千萬嘅機場新貴賓室，噚日正式開幕。雖然佔地5,000幾平方呎唔算好大，但總算一應俱全。喺開幕禮上，港航仲請來女神級「B餐」謝安琪，穿上空姐制服做神秘嘉賓，即刻搶晒風頭。
港航貴賓室標榜本土情懷，特別搵師傅駐場製作雞蛋仔，亦有齊中西式點心。新貴賓室叫「紫荊堂」，位置係離港層近23號登機閘口，喺正國泰航空（293）「爾雅堂」隔籬。
港航副總裁孫劍峰話，公司落足本提升商務艙服務，希望乘客試吓。
孫劍峰亦都提起前幾日發生嘅「800蚊強國客」佔領飛機事件，佢強調，公司只係選擇「妥協」，而唔係「屈服」；800蚊係「補償」而唔係「賠償」。佢好理解同事嘅不滿，對於有員工發起7月1日罷講普通話，佢相信員工敬業認真，唔會出現罷講情況。