現年30歲的「星夢幫」鄭俊弘風流成性，雖然與秦沛女兒姜麗文拍拖兩年，但一直不肯承認戀情，敢拍不敢認的他不止對感情零承擔，還肆無忌憚背正印四出媾女。昨日有讀者向本報爆料，指今屆港姐亞軍蔡思貝主動出擊姣媾鄭俊弘，結果成功橫刀奪愛，兩人暗撻兩個多月，4月更拍拖到紅館睇台灣樂隊蘇打綠演唱會，有圖有真相。
當晚蔡思貝着橙色衫十分搶眼，鄭俊弘就戴了有框眼鏡，兩人坐在第五行睇騷，被同場觀眾一眼認出。據知，蔡思貝主動激追鄭俊弘，頻頻藉捧場冧暈男方，4月單人匹馬去會展捧為巫啟賢個唱擔任嘉賓的鄭俊弘場，還入後台與男方及王君馨、鄭世豪等合照留念；端午節當日，蔡思貝又捧花到紅磡，為處男行貓步的鄭俊弘打氣。
換低胸裙會男友
雖然事後蔡思貝辯稱探班只是剛巧路過，當日早上她出席龍舟活動獲大會送花，她借花敬佛送給鄭俊弘，惟網友卻影到她着低胸裙捧花到場撐鄭俊弘，跟現身龍舟活動所着的裙子不同，明顯是刻意返家扮靚靚換裙見男友，踢爆她「剛巧路過」是講大話。
鄭俊弘雖然憑《星夢傳奇》歌唱比賽節目成名，可惜後勁不繼人氣持續下跌，相反緋聞卻越來越多姿多采，包括正印姜麗文、07年港姐亞軍王君馨、「巨聲幫」王嘉儀，加上傳拍劇撻着的蔡思貝，一腳踏四船超級花心。對於被踢爆跟蔡思貝暗撻兩個多月，昨日他接受本報電話訪問說：「唔好意思，唔會回應。」追問是否與蔡思貝拍拖？他死撐說：「冇啲咁嘅事，我冇嘢回應。」
採訪：皓騫
【我撐公投】網頁:
http://622popvote.appledaily.com