英格蘭今屆分組賽已經出局，喺踢完對哥斯達黎加嘅最後一場分組賽之後，一眾三獅兵就已經返咗英國。佢哋班機分別停曼徹斯特同埋盧頓。曼聯、利物浦等北部球會嘅球員就會先落機，跟住返倫敦附近嘅球員就會繼續飛去盧頓。
返屋企打機FF
成績咁差，就梗係唔會有咩歡迎儀式㗎啦，亦都唔好預有人接機。都好彩，喺曼徹斯特都有一個攝影師同一班小學生咁啱參觀機場，順便都叫做有睇住班球星喺飛機行落嚟。好彩曼徹斯特機場準備咗專車喺跑道接班國腳，可以嗱嗱聲走咗算數，唔駛留喺到獻世，仲可以快啲返屋企打機，因為有贊助商送每個球員一部遊戲機，話唔定佢哋會學吓當路雲，喺遊戲世界用自己捧盃嚟FF（最終幻想）吓。
傳羅渣士代「學神」
一個鐘頭後嘅盧頓機場，情況就有啲唔同，至少真係有人專誠嚟接機嘅。其中在場有兩個球迷都話，支持領隊鶴臣喎。原來喺香港俾人叫做「學神」嘅佢喺英國都有唔少球迷支持㗎喎，不過唔知英足總又點諗呢？雖然鶴臣就可以保住飯碗到2016年，不過足總入面都有對佢不滿嘅聲音。有部份高層堅持要鶴臣親自就今屆賽事球隊嘅差劣表現作出解釋。鶴臣真係唔好咁老定，因為已經開始有消息傳出，英格蘭可能會炒咗佢，由利物浦領隊羅渣士接任呀！
另外，之前話踢完世盃就會退出國家隊，跟住對哥斯達黎加前又話要再諗諗嘅林柏特，同埋話會喺世盃後研究自己喺國家隊將來嘅謝拉特，都仲有機會喺歐國盃外圍賽上陣。我求大俠覺得，必要時出吓兩老，都可以對球隊起到作用，仲可以畀啲細嘅學吓嘢。不過要佢兩個擔正呢，就唔好搞喇！
識睇 一定睇蘋果嘅足動世盃：
http://worldcup2014.appledaily.com/