【亂噏24】無綫一台獨大，間接令藝人工作機會減少，兩位港姐冠軍譚小環和楊思琦因此先後離巢，前者開舖自力更生，後者北上拍戲賺錢養女。黎智英對於譚小環能放下身段賣魚蛋，相當佩服，即場分享他的做生意秘訣。讀者可在 http://bit.ly/appletalk24重溫今集《亂噏24》。
撰文：馮國康
今集《亂噏24》請來兩位港姐冠軍譚小環和楊思琦擔任嘉賓，兩人先後離開無綫，話題當然離不開此。香港電視生態畸形，市民睇電視選擇不多，但藝人亦一樣，思琦說：「大家都知電視台得幾個，所以想睇吓內地有冇機會，可以打入內地市場先，等內地朋友多啲認識我。」言語間思琦還是顯得憂心忡忡，肥佬黎提議她不妨試試拍些手機短劇，他說：「喺手機市場裏面，到底表達方式係點樣，𠵱家仲未有人搵到。如果你行先，你就會搶先一步。」徐緣認同現在媒體渠道增多，明星不再倚靠電視台來宣傳：「自從有咗網上或手機嘅節目，題材闊咗好多，好多網台都雨後春筍，對藝人都有着數。」
嘆過去流失機會
作為單親媽媽，思琦供樓養B全部一腳踢，能夠大膽脫離TVB，全憑一份大無畏精神，她說：「女仔青春有限，如果再擺多四、五年，到時係俾人放棄，而唔係我自己有權選擇。」柳俊江對思琦這句話非常感動，便問她是否在無綫沒機會發揮？思琦慨嘆過去接工作沒自主權，她說：「人哋敲門嘅時候，隔咗一重經理人先到我哋，有好多機會都流失咗。」
肥佬黎相當支持思琦勇於向外闖蕩：「你有個女，冇爸爸㗎啦，得你一個養。好多人會覺得兒女係負擔，但我自己有六個細路仔，我就覺得有細路仔，你人生豐富好多，令你有目標去做事，對你嚟講，可能係一個好大嘅助力。」
思琦一離開無綫，即有機會返內地拍戲，可惜要跟女兒分隔一段時間，她說：「𠵱家有機會同佢一齊玩，我會盡量畀多啲時間佢。」幸好她的母親可以幫忙湊B，令她無後顧之憂，思琦又大爆母親趣事：「阿女喺屋企叫媽媽，我問佢乜嘢事，原來佢拉住婆婆當咗係阿媽！」
提到手機媒體，小環便是其中一位受益者，自從《壹週刊》報道她開舖賣魚蛋後，消息不斷在網上流傳，帶挈舖頭生意大增。小環承認：「《動新聞》先犀利，我覺得配音好正！」肥佬黎佩服小環身為港姐冠軍，也可以放下身段賣魚蛋，他說：「好似你生得咁靚，又係香港小姐，分分鐘可以嫁個闊佬唔使做。但係千祈唔好呀，嫁闊佬唔幸福！」小環一邊偷笑，一邊說：「所以我唔揀闊佬！」肥佬黎又以生意人身份勸勉小環：「雖然開工要成十幾個鐘，但嗰種滿足感係第二啲畀唔到你囉。你辛辛苦苦賺番嚟，睇住個生意慢慢咁蓬勃，你個人會好開心！」
入多咗貨賣唔晒
柳俊江猛讚思琦和小環能屈能伸，稱連肥佬黎也做不到：「黎老闆你得唔得先，𠵱家要你落番嚟賣魚蛋？」肥佬黎自愧不如：「我如果賣番魚蛋，好大鑊㗎啦！」柳俊江的妻子開婚紗舖，有時需要他幫手，他總會笠頂帽及戴眼鏡喬裝，他說：「雖然冇乜人識我，但嗰種自尊心放低唔到。」便問小環如何放下身段？她說：「因為我入行資歷都唔短，都十幾年，真係睇化晒，所以放下身段好多年喇！你話係咪一個難關，我又唔覺得係，反而放開個心去做，又冇乜所謂。」
不過小環開舖不久便差點中伏：「初初《壹週刊》報道後好好生意，排晒長龍，一日可以賣出一萬粒魚蛋燒賣，腸粉都賣幾千條，諗住發達啦，於是就入多啲貨。」誰知接連紅雨、黑雨警報，銅鑼灣也人煙稀疏，結果食物賣不出，她說：「逢星期一至四入普通數量，五六黃金時間先入多啲，但都睇定啲先入。」肥佬黎即場指點迷津，教小環做生意：「要做到同人唔同，腸粉唔可以擺太耐，仲要研究點樣做好自己啲醬，係唯一make the difference。」他又勸小環千萬不要心急擴充分店︰「做食肆好辛苦，生意好開分店分分鐘死，因為冇人肯咁辛苦同你捱。」
將品牌變得獨特
閒時小環會巡舖，成為了生招牌，究竟名人效應能否帶動食肆生意？身為市務總監的徐緣，認為名人效應不能持久，反而產品質素較重要，並舉出台灣品牌《春一枝》做例子，就是將品牌變得有獨特性，建議小環仿效。講到產品定價，小環擔心價格太貴會令街坊不滿，肥佬黎則認為服務質素最重要，並分享當年做佐丹奴的經驗：「我以前做佐丹奴，發達都係因為補貨。紅色tee大碼冇晒，我哋即刻飛的士去倉攞畀你，我蝕畀你，但你以後就做咗我嘅客人。」
有慳妹之稱的思琦，認為小環店舖收費合理，因為某些雪糕幾十蚊一杯，她說：「細個好鍾意食一款雪糕，𠵱家四、五十蚊一杯，好想食番呢份童年回憶，但又好貴。」思琦妹坦承購物都要看價格：「大眾最緊要係精明眼，平同抵格過價！」小環急着附和：「我哋啲師奶當然要睇吓邊個平啲先至去買。」柳俊江又出動鬼主意：「咁如果小環你想賣貴啲又吸引到客，不如一邊賣魚蛋，一邊播《如果天空要下雨》，啲回憶返晒嚟！」當年主唱者小環一聽到馬上毛管戙。
兩大港姐駕到 劈炮原因逐個數
http://bit.ly/talk245101
睇手機已成習慣 思琦妹都要玩
http://bit.ly/talk245102
嫁闊佬冇幸福？ 自食其力先有福！
http://bit.ly/talk245103
婆婆湊孫唔太差 孫女當正係阿媽
http://bit.ly/talk245104
放下身段賣魚蛋 小環靠自己開飯
http://bit.ly/talk245105
如果命運能選擇 思琦湊B好豁達
http://bit.ly/talk245106
撈飲食最辛苦 熱辣蒸氣當護膚
http://bit.ly/talk245107
日賣10000粒魚蛋？小環爭啲撞板！
http://bit.ly/talk245108
客仔要求高 藝人開檔唔易撈
http://bit.ly/talk245109
名人效應唔夠殺 想人幫襯有妙法！
http://bit.ly/talk245110
徐緣教路 賣雪糕咪怕價錢高！
http://bit.ly/talk245111
幾十蚊都嫌貴 明星買嘢都要抵！
http://bit.ly/talk245112
大陸登台好危險 小李飛杯要識閃
http://bit.ly/talk245113
電視平台好死板 手機開拓新空間
http://bit.ly/talk245114
網上明星點煉成 出位要靠學藝精
http://bit.ly/talk245115
【我撐公投】網頁:
http://622popvote.appledaily.com