世界盃踢咗兩周，西班牙、英格蘭和意大利先後出局，顯示美洲球隊佔盡地利；而呢兩日賽事焦點，當然係烏拉圭前鋒蘇亞雷斯又「出口傷人」，出動其西瓜刨咬對手，國際足協已開「快勞」跟進，咬人蘇隨時又要坐波監，同今屆世界盃講拜拜。
有外電報道，有外國莊家開盤估蘇亞雷斯喺大賽期會否咬人，賠率有175倍，買中嘅仁兄肯定笑逐顏開。
至於家陣好流行嘅免費煲劇睇波恩物乜乜盒子，聽講近期風聲緊，好多時都睇唔到世界盃直播，日前有報道指阿爺加強視頻app的監控，唔知「免費午餐」仲可以食幾耐。話雖如此，繼亞馬遜後，聽講Google亦銳意進軍機頂盒市場，可見網上煲劇係大勢所趨，睇劇地域無界限，選擇眾多下，傳統電視業繼續食老本，瓜柴指日可待。
滙市方面，美國周三公佈首季GDP負增長2.9%，是五年最差，其中個人消費增長，由初時估計的2.4%調低至得返1%。雖然大家都心裏有數，理解上季經濟唔掂同雪災有關，但數字始終跌得比較誇，加上5月耐用品定單亦唔靚，為聯儲局鴿派陣營主張延長低息期增添理據，所以美金呢兩日表現麻麻。
環顧本周大市，紐元和加元表現較省鏡，前者繼續受加息概念，後者就得益於油價上升。美國首季經濟差，加息料有遲無早，套息交易概念對澳紐元呢類「高息」貨幣有利，紐元昨日曾升至87.77美仙，同上月的兩年半高位近在咫尺，仲差約0.8美仙，就可以打破2011年8月88.43美仙的紀錄新高。
央行遏樓市 英鎊未洩氣
新西蘭今年加三次息後，基準利率達3.25厘，比聯邦基金利率及日本同類官方利率多3厘，成為幣值上升動力。由於新西蘭儲備銀行上次議息後暗示未加夠，市場估7月會再出手。加元方面，伊拉克不穩局勢持續，令市場擔心影響其原油出口，令國際油價近排仍在9個月高位徘徊，對加拿大石油經濟有利。美元兌加元昨日跌至1.07邊。
順帶一提，美國近年積極發展頁岩氣後，原油產量升得快，副產品越積越多，經過業界爭取後，白宮日前終於放寬長達40年的出口禁令，畀兩間德州油企出口超輕質油，算係為解除禁令踏出第一小步。
英倫銀行行長卡尼似乎又學人玩模稜兩可，前個禮拜講可能提前加息後，早兩日又暗示唔加得多，搞到英鎊前日碌返落1.7美元樓下。不過，英倫銀行昨日再出招遏樓市，包括收緊按揭及要買家通過更嚴格的壓力測試，市場認為招數唔算太辣，對經濟影響有限，英鎊昨日又重上1.7，逼近五年新高。
奇兵
本欄逢周五刊登