珠江鋼管（1938）今年頭一季定單，已經達去年全年交付量，嚟緊日子，阿爺加快管道鋪設，加埋頁岩氣、中俄管道同海洋資源戰略等大project，珠管業績應該似火箭，絕對有得諗。
珠管係全國最大，兼唯一一間集三個國家級榮譽嘅直縫焊管製造商，技術規模架勢堂之餘，珠管喺珠海的基地，更是毗連中海油海洋資源生產基地，加埋自營碼頭，同連雲港生產基地，比起行家，又有多重港口物流便利，有埋港內同出口優勢。
首季定單超去年總量
珠管今年頭一季，接單近37萬噸，已經超過上年總交付量，今年成績單已經搞掂。上年石油板塊地震，唔少project叫停，但喺落實環保前題下，滯後工程，今年要火速前進。按照規劃，「十三五」管道鋪設30萬公里，係「十二五」兩倍長度。
再講，隨住中、俄天然氣斟掂數，兩國管道鋪設，特別加埋海洋資源國策，呢壇製作，需要高質量管道，而珠管係內地唯一可以生產1,500米水深適用深海焊管嘅生產商，阿爺一拍板，對珠管嚟講，中長線就啖啖肉。
咪扯咁遠，單係陸路鋪設，珠管已經肥仔。專業評估，珠管今、明兩年EPS約0.14元同0.26元，明年預測PE跌到得10倍。祖國行家明年平均15倍PE，珠管平咗截。
行家天大管材（839）今年升咗58%，同海洋資源有關嘅巨濤海洋（3303），上個月頭發力，累升26%，今年以來亦累升18%。珠管現價（2.67元）仲係輕微潛水。
買珠管，博破一年頂3.16元，當追番上祖國行家平均15倍PE，講緊要翻半番到4蚊。
錢雋
細價股專家
本欄逢周二、三、五刊出