中國國務院發表嘅一國兩制白皮書，內容令香港人不安，點解依家打開天窗說亮話，語氣強硬呢？主要係因為到了回歸第十七年2014年，中國比1984年簽署中英聯合聲明時強大得多，有錢得多了。1984年中國有外匯儲備82.2億美元，到了今天（蘋果6月23日新聞），中國有外匯儲備4萬億元，三十年內增加咗4878倍（按：由1954至1984只係增加咗93.4倍），正是穿金戴銀，領導人信心十足，李克強到英國大灑金錢，既嫌英國歡迎佢嘅紅地氈唔夠長，又要英女皇請佢兩夫婦飲tea，然後與英國簽下達2300億港元訂單，幾咁威風呀！與30年前相比，中國已不可同日而語，點會仲嚴格遵照鄧小平所講嘅一國兩制精神吖，咪索性講到明明白白，毫不含糊咁，北京先至係老闆，香港要乖乖地聽晒話，並無甚麼剩餘權力囉，香港人聽唔聽悉隨尊便。不過講得太盡嘞，又話法官要愛國，殊不知香港特區政府上星期先至委任咗兩位終審法院海外法官，係英國人噃，呢兩位法官要愛甚麼國？
呢啲說話，點解今日先至講呢？唔講金，講統戰，大家不妨讀吓練乙錚教授嘅文章（信報6月23日）嘅文末四段。練教授年輕時在美國讀書，信咗馬列毛，對統戰另有一番深刻體會，佢話：「到形勢改變，例如『天亮了，解放了』，不需要再假惺惺順着你的意思說話了，他就露出真面目；這時，你對他的觀點有任何保留或者竟然堅持反對態度的話，你就是忘恩負義，揭錯皇曆，奴性不改……」嗱，2014年正是「天亮了」的時刻，中國成為世界第二大經濟體，外匯儲備佔全世界同類儲備34%，小小一個香港，雖是中國第一富有城市，有甚麼大不了，中國蝕得起。一位老友睇完劉銳紹嘅白皮書分析（明報6月23日），再周圍問吓，特別打電話通知左丁山：「喂，暫時唔好買股票呀，消息人士話中央好不滿香港有人搞佔中公投，指係頑皮小子愈來愈唔聽話，成日頂心頂肺，預備要狠狠打佢一巴，略施教訓，最壞嘅情況，打殘再同佢醫番，白皮書就係口頭警告，你因住啲投資呀，唔好亂嚟！」講得咁嚴重，恐怕啲大有錢佬會驚過左丁山，係時候啟動狡兔有三窟咯。一位退休老友最近去澳洲一行，發覺已有不少香港「澳洲人」已悄然搬嘢返鄉吓喎。