肥頭：德叔，畀杯凍華田我。咦，街霸Ken，好耐冇見喎，生意好嗎？
街霸Ken：哈哈，一般啦！
德叔：冇理由㗎，𠵱家免費台冇得播世界盃，應該多咗人訂收費台㗎？
肥頭：德叔，你諗得咁簡單嘅，𠵱家網上周圍都有得睇，加埋好多人第二日都返工，未必真係捱夜啦！
街霸Ken：或者好似你咁講啦，肥頭。其實仲有一個因素，就係𠵱家好多商場都有直播，仲有小食派，如果我冇得睇，都揀去商場啦！
德叔：怪唔得前兩日撞到喺酒吧街嘅發仔，佢話佢隔籬間酒吧訂咗收費台，但生意又唔覺特別好。
街霸Ken：分組賽差唔多啦，8強、4強嗰啲應該先會多番好多人。
德叔：好彩我最後都冇裝。當時仲曾經諗過，但福嬸就同我講算罷啦，你又冇諗住開通宵。
肥頭：嗱，德叔，如果你搞，我、祥Hi、艇仔張同街霸Ken一定晚晚捧場！
德叔：唔見你，我都call爆你啦，但係得你哋4個，我都唔夠食啦！
街霸Ken：係喎，肥頭，祥Hi呢？
肥頭：我頭先有打畀佢，但佢話喺屋企食杯麵算喎，好似話場場都睇，睇到太攰唔想郁！
街霸Ken：咁你叫佢小心啲啦，之前咪有單新聞話，有個後生仔因為唔夠瞓，睇到暴斃咩？
德叔：唉，你同佢咁老友，勸吓佢睇少陣啦！
肥頭：佢唔會理我㗎。咪好囉，今日有得唞番日，之後16強又殺到埋身，睇佢仲頂唔頂到。
人物介紹：
德叔——旺角茶仔老闆
肥頭——吹水怪
福嬸——茶餐廳侍應
街霸Ken——收費電視企街sales
艇仔張——扮專業賭友
大鍋——江湖中人
識睇 一定睇蘋果嘅足動世盃：
http://worldcup2014.appledaily.com/