經過兩星期冇停嘅巴西世界盃，球迷們今日終於可以唞吓，唔駛捱夜，可以瞓番夠本。期待已久嘅16強亦正式誕生，數到目前，以哥斯達黎加表現最為驚喜，亦再一次證明，波係圓㗎！
賽前抽中喺死亡D組，被視為陪跑分子，哥斯達黎加反而成為第一隊取得出線資格嘅隊伍，仲間接率先踢走真正要陪跑嘅英格蘭，球迷無不訝異，連國際足協都即刻捉咗7個球員去藥檢，簡直創造傳奇一刻。
拜仁雷斯有模特兒feel
哥軍隊長拜仁雷斯（圖）肯定有最大功勞，呢位10號全能中場球員係球隊進攻嘅泉源，技術一流，不但多次為隊友創造機會，自己都有入球進賬。呢位美洲球員仲有俊俏而斯文嘅外表，身形較為單薄，反而更有模特兒感覺！世盃過後，相信降落英冠嘅富咸要加碼留住呢位當打中場球員。
弱隊要「泊大巴」
去到16強，實力唔算好高嘅球隊不時會「泊大巴」喺禁區附近，穩守突擊，意思係指多位球員喺自己禁區前防守，好似一架大巴士咁阻擋敵人進攻。唔知哥軍嚟緊會唔會都出呢招？
陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/