世界盃16強就快產生，官場燈神亦誕生。燈、燈、燈、凳！食物及衞生局局長高永文捧嗰三隊，有兩隊已經出局，淨番葡軍垂死掙扎，燈神可謂當之無愧；同樣係明燈嘅有教育局局長吳克儉，事關佢亦撐雙牙，怕且所有國際球壇名宿，都唔想被呢兩位燈神點燈。
查實要梅開二度，真係有啲難度㗎，偏偏民望高就做到嘞，佢捧嗰三隊勁旅葡萄牙、西班牙同意大利，喺全城人熱捧下，西班牙同意大利已經同觀眾講拜拜。八方噚日問民望高，點睇自己變身為新一代燈神？佢話其實捧呢三隊球隊，都係因為呢三隊較冇紀律，同佢嘅醫生性格啱啱相反。如果呢三隊out晒就會心死，表明唔會再點燈，呼籲其他球隊支持者放心。
官場燈神亦包括吳得掂。佢早前接受無綫訪問時，講過睇好西班牙，球員嚟講，佢最鍾意葡萄牙嘅C朗，點知經佢「表明心迹」，兩隊球隊都冇運行，狂牛已經黯然同巴西「分道揚鑣」，連C朗都自認葡軍實力有限，出線機會渺茫。
曾德成睇好森巴隊
民政事務局局長曾德成比民望高同吳得掂眼光似乎準好多，睇好森巴兵團佔主場之利，認為今年捧盃無難度。若然巴西未能奪冠，德成局長會唔會自嘆貼唔中波，何罪之有呢？
李八方
mailto:[email protected]
【我撐公投】網頁:
http://622popvote.appledaily.com