32歲的薛凱琪（Fiona）是在溫室下成長的80後，曾拒絕長大、夢想活在童話世界之中，入行十年被迫長大，還練出鐵一般的耐力和阿Q精神，8月出碟，９月又於紅館開十周年個唱，工作排山倒海，但愛情卻交白卷，Fiona坦言已十分ready拍拖，在等待真命天子的出現前，寧願選擇單身，暫時跟戲中的「男友」或「老公」談一場有限期的戀愛，尋找戀愛滋味。
統籌：林妙萍
採訪、造型：顏英儀
攝影：周樂恒
化妝：Jessica Chan
髮型：Jo of Salon Queens by Private i
22歲出道的薛凱琪（Fiona）入行十年傳得最多的就是緋聞，名單有房祖明、方大同、黑人Reggie，就連同性的林二汶都傳過，桃花旺盛的Fiona即大呼說：「我澄清完一次又一次，冇一個緋聞男友係真嘅！我覺得嗰啲唔係桃花係惹是非，桃花係好多個人追你，嗰啲行街影到就當係緋聞，睇完當笑料一則，娛樂到大家我冇所謂，我阿Q精神，安慰自己唔惹新聞又點做藝人呢？無一樣嘢係完美嘅，唔可能有人識你但又冇負面新聞。」
拒絕玩伴
Fiona今年30有２，雖然長有一副童顏，但已步入中女階段，「我唔心急拍拖，但你問我ready拍拖未？Oh, I'm so ready！但唔係要一個玩伴陪我或怕悶要搵人陪，如果係，我一早搵到又或者搵咗好多個，我要搵一個錫我、信得過又專一嘅人，大家可以一齊行一條好長嘅路，暫時未有機會同一個咁嘅人拍拖。」
仍舊單身的Fiona表示父母很痛錫她，但沒有愛情滋潤，生命中總感到有所缺失。天生浪漫主義者Fiona喜歡幻想，在工作中一嚐戀愛滋味，「雖然私生活冇拍拖，但我可以喺拍戲、唱歌時談戀愛，就算唱歌都唔會唱喊苦喊忽嘅歌，等待亦可以好浪漫，我可以喺歌曲感受戀愛，唱歌時I feel like I'm in love，每次接到愛情片都會好開心，因為我可以全情投入去愛一個人，拍戲可以同『男友』行街，或煮飯畀『老公』食，一定要make sure愛上對方，一拍完就會即刻出返嚟，做藝人幾好彩可以有好多戀愛時間，但自己嘅真命天子就仍然等待中。」
十年回顧
為慶祝入行十周年，Fiona將於9月在紅館開演唱會，8月會出新碟，繼續同緋聞男友方大同合作，新歌《弗洛蒙》兩人更合作拍了段自家MV，「個MV即興拍嘅，遲啲會有一個真嘅版本。今次演唱會開四面台，想同歌迷回顧呢十年，感恩喺呢十年我得到好多，有一份我好愛嘅工作，可以拍戲、出碟，想用正能量影響更多人，或者呢十年錯過咗其他事，若果我冇入行，可能已經結婚生仔，𠵱家冇，可能係個天覺得你唔deserve，或唔啱timing，有啲嘢一世都得唔到可能根本唔屬於你。」
天生工作狂
獅子座的Fiona事事講求進步，為了演唱會天天練歌，「十年前我唱《奇洛李維斯回信》唱得唔夠好，我會不斷練歌，想唱出另一把聲同心情，時時都要有進步同新鮮感。」談到40歲前的人生大計，Fiona就順其自然，「我覺得工作上可以plan，但唔重要嘅目標或者達唔到嘅目標我係唔會set，我永遠唔會希望自己35歲前要攞到影后或攞到叱咤女歌手金獎，因為呢啲唔係我控制範圍之內嘅事，唯一一樣我係aggressive就係一定要自己進步，我係一個工作狂，可以一身兼八職，因為我好enjoy工作。」
更多精采時尚內容，盡在 http://add.appledaily.com。