下周二就係香港回歸17周年，有人揀慶回歸，當然有人上街遊行，本地中資龍頭行中銀香港（2388），就趁回歸日配合「退休人仕及長者博覽暨亞洲銀髮產品展」，搞搞新意思，聯袂按證公司合辦兩場「安老按揭」專題講座，分別喺7.1同埋7.3舉行。
過去中銀有冇喺公眾假期或7.1舉辦財經專題講座？華華就唔記得，該行發言人回覆話，中銀只係銀髮展其中一間參展商，想藉此機會推廣安老按揭，有關活動乃由主辦單位縱延展業負責聯絡。
之不過，今年適逢公投，社會爭拗亦多，形勢比過往緊張，7.1當日中資機構行任何活動，好難唔俾人產生屬於「對沖風險」嘅聯想。
專題主講嘉賓，包括中銀個人金融及產品管理副總經理周澤慈、按證公司高級副總裁陳達強，仲有藝人石修現身說法。