本地珠寶股謝瑞麟（417）每年年報都會搞吓花臣，搵晒成班管理層同埋董事，齊齊就住一個主題影番輯靚相，早年佢哋曾經試過玩夾band，又曾經試着皮褸揸電單車。今年公司似乎想行歐陸風格。
現年77歲嘅創辦人「大謝生」謝瑞麟，就着咗一身啡色西裝配黃白色皮鞋，仲戴埋頂紳士帽，低頭微笑look，望落成個格局，竟然係有幾分似美國歌手Bruno Mars嘅造型。
至於公司嘅「御用Model」，即係謝氏新抱兼主席謝邱安儀，佢喺年報入面總共換咗五個look，由黑色晚禮服，到乾濕褸，連橙紅色套裝都有，形象百變，真係仲高規格過行show。而一眾男董事同高層，亦相當配合主題，襯晒領巾、又着吊腳褲咁chok晒罷甫士影相，相當畀面。