【拆 局】
二線舖租冧價？查實講緊「非一線舖」，即是身處核心零售區、食自由行條水的內街二線舖位。近年這類舖租吊高到一線價錢，以為無人接？事實又唔係喎，畢竟100蚊一碗車仔麵不是夢，難怪業主加到天價，仍有租客承接，始終羊毛出在羊身上。但好景不常，零售市道轉差，自由行豪客不再，二線舖自然還原，冧租亦難免，只是跌多少的問題。
近年這類二線舖承租能力強的另一原因，是一線舖位搶到癲，逼得傳統一線租客改租區內二線舖頂住先。目前專做自由行生意的奢侈品牌陸續縮舖，當一線舖櫥窗是廣告牌的國際品牌又唔再搶位，呢批傳統一線租客勢將回歸一線舖位，形成連鎖反應，搞到次一級的舖位無人再用高價承接，最終令二線舖還原民生舖身份。民生舖係乜租客？茶記吧，最低工資、食材價格上漲，如果有心做本地客生意，點會肯出高價承租。
至於這類二線舖租最終會跌到甚麼水平？行內認為，參考2010年至2011年的租金，當年剛從金融海嘯復原，自由行一簽多行效應未完全浮現，舖租仍未爆升，如果拎返新租約，對比那個年頭的租金，應該都會有一至兩成升幅。始終通脹物價年年漲，舖位自然會跟隨。
識睇 一定睇蘋果嘅足動世盃：
http://worldcup2014.appledaily.com/