日本喺今屆世盃雖然人腳幾好，加上分組賽對手唔算話好強，賽前一直話有機會攞到好成績，但落到場就見真章。最後一場對同組最強嘅哥倫比亞，賽前都仲有少少希望可以奇蹟出線嘅，不過最終都係無能為力，以1:4大敗，踢完3場之後只係得1分，小組包尾出局，真係令班球迷失望。
慘負哥倫比亞1:4
日本隊啲球員表現或者要彈吓，不過佢哋啲球迷就真係值得大家畀個like！雖然佢哋因為球隊輸波都好失望，個個喊晒口咁，但係仍然同早兩場一樣，大家睇完波冇話即刻拍吓籮柚走咗去就算，而係留低執番啲垃圾。呢個行為早前已經被世界各地嘅傳媒大讚，估唔到佢哋喺球隊出局嘅悲痛心情下，都仍然可以維持住呢種美德。其他方面我求大俠唔評價，但講公德心，日本人嘅質素真係全球首屈一指。
日本人咁有品，唔多唔少都係因為有好嘅國民教育。佢哋由細到大都識得守規矩，亦唔會做啲影響人哋嘅事情。例如佢哋揸車會讓等過馬路嘅行人行先、唔會喺條街度一路行一路食煙等等。香港人可以話拍馬都追佢哋唔上，淨係教啲人唔好喺單車徑行路或者跑步，都唔知要幾多年先可以有成效。所以話，香港其實係需要真正嘅國民教育㗎，不過我哋唔係要洗腦愛國囉。
蒙達干創最老紀錄
呢場波除咗有品日本球迷外，其實仲有另一個焦點，就係哥倫比亞守門員蒙達干，喺85分鐘入替奧斯賓拿，取得佢個人第56頂「喼帽」之餘，仲以43歲零3日，打破咗世盃最年老球員上陣紀錄，而舊紀錄係由喀麥隆嘅米拿喺94年嗰陣創下。咁啱蒙達干第一次踢世界盃就係94年，即係20年前。
識睇 一定睇蘋果嘅足動世盃：
http://worldcup2014.appledaily.com/