孫柏文早兩日話一注獨沽的士牌，指先後令歐美的士司機叫救命嘅Uber打入香港，會令牌價下跌。查實菲菲5月20日篇專欄已講過Uber喺香港難做得起，更遑論影響牌價。首先香港真係太細，早前講過除咗朝早同交更，又或者打風落雨，根本要車有車。想快嘅隨街可截；想慳錢嘅大家手提都總有一兩個幫到你慳錢嘅電話號碼。行高端路線嘅Uber，收費自然異常尊貴，最低消費50蚊，單係由中環去銅鑼灣已經要80幾蚊。試問一般情況點會揀Uber？
孫柏文講Uber令三藩市的士租金跌咗一成，大家要知三藩市出名難截車；歐洲除咗難截車，本身坐的士已好貴；Uber勝在快，所以唔少人會寧願畀多少少去用Uber。Uber入到市場，供應增加，牌價自然下跌。當然Uber喺香港都會有客，可能係準備去酒會但唔想自己開車嘅人，又或者公司客。
嚴格來講Uber同的士根本唔同市場，反而一班商務車租賃公司先係競爭對手。但聽講Uber於香港好努力拉攏呢類公司同佢哋合作，變相一齊做大個餅，咁又係另個故事。結論係，Uber對的士司機收入影響可能有，但應該微乎其微，相信點都未至於推跌牌價；再者又係貨源歸邊問題，的士牌供應有限，一沽即時有人接貨，牌價想大跌，似乎真係難咗啲。
Fifi
http://www.facebook.com/lovefrystock
本欄逢周二、四刊出