艇仔張：
德叔，凍檸啡唔該。
德 叔：
艇仔張，做咩有神冇氣？嘩，隻眼仲好似熊貓咁，你想襯番早幾日嚟香港嗰1,600隻紙熊貓呀。
肥 頭：梗係佢晚晚睇波，朝早又要返工，搞到冇時間瞓啦。
艇仔張：好彩捱埋今晚就有番一日唞，希望回一回氣啦。
肥 頭：
最後一輪分組賽，咁你有咩心水先？
艇仔張：
梗係買比利時啦，南韓隊波都散晒。
德 叔：
南韓咁渣㗎咩？02年佢哋打到入4強喎，成個首爾逼晒人睇直播，一片紅海幾齊心，球員又夠鬥志，仲有個咩咩星，之前踢曼聯㗎喎。
肥 頭：
德叔，朴智星冇踢曼聯好耐啦，上季完咗仲收埋山㖭。
艇仔張：
仲有呀，踢波唔係齊心就夠，今年首爾都好多人睇直播㗎，不過輸畀阿爾及利亞嗰場，好多索過少女時代嘅韓妹仲睇到喊晒㖭，真係我見猶憐。
德 叔：比利時（圖）戰兩勝已出線，和波都可以首名，驚唔驚佢哋唔去呀。
艇仔張：我收到風比利時呢場會用啲後備，不過比利時厲害嘅地方就係兵源足，就算後備兵，都有唔少踢英超，同正選實力差唔多。
肥 頭：
咁你同組另一場點睇先？
艇仔張：
我就梗係買阿爾及利亞下盤啦，呢隊真係下盤王，兩場比賽下盤都食晒，認真夠正氣。
識睇 一定睇蘋果嘅足動世盃：
http://worldcup2014.appledaily.com/