首先恭喜晒，恭喜啲咩？唔係我有喜，而係我支持嘅巴西同比利時都順利出線，梗係要恭喜一吓啦！但係佢哋出線16強我都冇得喺屋企支持，點解？咪好似家樂咁，屋企冇裝收費台囉，但咁又難得到我咩！
我個人冇嘢多，就係朋友最多，自己屋企睇唔到咪去人哋屋企囉，仲另有風味㖭。我哋興開波前表明立場，各自撐番隊，「分清敵我」吖嘛！人哋可能會準備零食，睇波嘅時候可以有嘢咬吓，但我哋係唔會準備零食嘅，因為我哋鍾意一路睇波，一路打邊爐，得閒就烚嚿牛肉嚟食吓，咁樣睇波真係正呀。
睇到半場悶悶哋，又可以喺屋入面踢吓波，唔理嗰時係幾多點，好彩冇人投訴箒。仲有一個重要環節就係洗碗，只要你支持嗰隊輸波，就要洗晒打邊爐用嘅所有碗，既方便又快捷。
至於今晚比利時對南韓，只要比利時贏波就可以首名出線，唔使同巴西同線，即係話要碰頭的話，只會喺決賽見，所以今晚比利時一定要贏，咁決賽就有機會係我兩隊愛隊巴西同比利時嘅對決嘞！正！文：陳子樑
識睇 一定睇蘋果嘅足動世盃：
http://worldcup2014.appledaily.com/